Mae Kristin wedi dysgu gwir ystyr geiriau fel ‘cynhwysiant’ a ‘chydraddoldeb’ trwy ei phrofiad byw fel mam a gofalwr i’w mab, Gwilym, a’i thair merch. Ers i Gwilym gael ei eni yn 2015 gyda syndrom Down, mae Kristin wedi herio’r disgwyliadau isel y gall systemau a sefydliadau eu rhoi ar blant ag anableddau.
P’un ai mewn gofal iechyd, addysg neu gymdeithas ehangach, mae hi’n gwrthod derbyn y dylai anabledd benderfynu ar y llwybr y disgwylir i berson ei gymryd trwy fywyd. Trwy eiriol dros Gwilym, mae Kristin wedi ennill blynyddoedd lawer o brofiad yn llywio systemau cymhleth, herio rhagdybiaethau a gwneud yn siŵr ei fod yn cael ei gynnwys, yn cael cyfleoedd a’i drin yn gyfartal ochr yn ochr â’i gyfoedion.
Mae Kristin yn angerddol am ymhelaethu ar leisiau pobl anabl ac amlygu’r rhwystrau maen nhw’n eu hwynebu, a llawer ohonynt yn aros yn anweledig i’r rhai sydd heb brofiad uniongyrchol o anabledd.
Mae hi’n cyfuno’r profiad byw hwn â chefndir proffesiynol mewn ffotograffiaeth a chyfathrebu ac mae ganddi ymwybyddiaeth arbennig o sut mae pobl anabl yn cael eu cynrychioli, eu gweld a’u deall. Mae gan Kristin radd Meistr mewn Ffotograffiaeth Ddogfennol ac mae wedi gweithio fel ffotograffydd clinigol yn y GIG. Mae hi’n credu y gall gwelededd a chynrychiolaeth chwarae rhan bwysig wrth herio canfyddiadau a newid disgwyliadau.
Mae Kristin hefyd yn rhannu stori ei theulu drwy’r cyfryngau cymdeithasol, gan ddogfennu heriau a chyflawniadau Gwilym yn ogystal â’r bywyd cyffredin, llawen a llawn iawn y mae’n ei arwain. Mae eu stori bellach yn cael ei dilyn gan gynulleidfa fyd-eang o fwy na 15,000 o bobl.
Beth mae bod yn Ymddiriedolwr yn ei olygu i mi
Fel Ymddiriedolwr Anabledd Dysgu Cymru, byddaf yn dod â’m profiad personol a phroffesiynol, parodrwydd i ofyn cwestiynau a’r hyder i herio rhagdybiaethau. Rwyf yr un mor ymrwymedig i wrando a dysgu oddi wrth eraill ac, yn bwysicaf oll, credaf fod yn rhaid i bobl ag anabledd dysgu eu hunain fod wrth wraidd penderfyniadau sy’n effeithio ar eu bywydau.